Chavakiran's Blog

Chavakiran's personal blog

Are you missing the power of vim on Eclipse?

Are you missing power of VIM in Eclipse?

Here are quick steps to make eclipse work like vim at the same time use eclipse’s power features. Best of both worlds!!

1. Install Vrapper. 

2. Use split editor feature of eclipse. (Window -> Editor -> Toggle Split Editor ) See this help page 

3. Map Ctrl + W from Closing windows to switch Windows!! (Window -> preferences -> General -> Keys)

 

Happy Vimming,

Happy Eclipsing

🙂

 

posted by chavakiran in Technical and have No Comments

బేసిగ్గా నేనొక పుస్తకాల పురుగును.

Read my interview at http://nnivedita.com/portfolio/kiran-kinige-com-telugu-books-portal/

posted by chavakiran in media and have No Comments

పాంపి గ్రహంలో పింపల వృక్షం

పాంపి గ్రహంలో పింపల వృక్షం

పింపల చెట్టు కింద పడుకొని, ఆకాశం వంక చూడసాగాడు- ఈశ్వర్. రోజులో ఈ అర్దగంట మాత్రం అతన్ని కదిలించకూడదని ఈ పాటికి ఆ పాంపి గ్రహంలో ఈశ్వర్ తో పరిచయం ఉన్నవాళ్ళంతా అర్ధం చేసుకున్నారు. వీళ్ళందరికీ ఆ అర్దగంట కూడా అన్ని క్షణాల్లానే మామూలుది, కానీ ఈశ్వర్‌కు మాత్రం ఆ అర్దగంట చాలా ప్రత్యేకమైంది. ఈ పాంపిగ్రహంలో ఆకాశం లేత ఆకుపచ్చ రంగులో వుంటుంది. సాయంత్రం సూర్యాస్తమయానికి ముందు ఆరెంజ్ రంగులోకి మారుతుంది. కానీ అలా ఆరెంజ్ రంగుకు మారే ముందు ఈ అర్థగంట ఆకాశం నీలం రంగులో దోబూచులాడుతుంది.

ఆకాశం పూర్తిగా ఆరెంజ్ రంగులోకి మారిపోయింది. తలక్రింద నుండి ఎడమ చేయి తీసి అరచేతిని షర్టుకు తుడుచుకొని చెయ్యి వెనక్కి తిప్పి కుడి చేతి చూపుడు వేలుతో నెమ్మదిగా స్వైప్ చేశాడు. ఎడమ చేతి వెనక చర్మంతో కలిసిపోయిన తెర ఒక్కసారిగా ఆన్ అయి గెలాక్టిక్ సంవత్సరం 2020 సమయం లోకల్ 16:00 అంటూ చూపించింది. గెలాక్టిక్ సంవత్సరం 2కె20; కొత్త సంవత్సరం వచ్చి అప్పటికి వారం రోజులే అవుతుంది. అప్పటికి యుద్ధం ముగిసి రెండు వారాలే అవటంతో కొత్త సంవత్సర కోలాహలం కంటే యుద్దానంతర కోలాహలమే ఎక్కువ కన్పించింది.

ఈ సంవత్సరం గెలాక్టిక్ గ్రహాలకు చాలా ప్రత్యేకమైనది. పది సంవత్సరాలకు ఒకసారిగానీ ఈ భూప్రభోత్సవం రాదు.

తను నాన్నతో కలిసి భూమిచుట్టూ ఉన్న ప్లాట్ ఫామ్ లపై నివాసం ఉండే రోజుల్లో ఒకే ఒక్కసారి ఈ ఉత్సవాన్ని అతి దగ్గరగా పరిశీలించే అవకాశం వచ్చింది. మామూలు రోజుల్లో తనపనిలో తానుండి అతి తక్కువగా మాట్లాడే నాన్నగారు ఆరోజుల్లో అకస్మాత్తుగా వేరేగా మారిపొయ్యారు. అన్నీ మహోత్సాహంగా వివరించి చెప్పారు. నిజానికి ఆ అకస్మాత్ మహోత్సాహం ప్లాట్ ఫామ్ లన్నింటికీ వర్తిస్తుందనుకుంటాను. సాధారణ రోజుల్లో ఈగలు తోలుకుంటూ ఉండే ఈ ప్లాట్ ఫామ్ లు ఈ భూప్రభోత్సవాలప్పుడు మాత్రం వచ్చేవాళ్లతో, పొయ్యేవాళ్ళతో కిటకిటలాడుతుంటాయి. తరువాత ఉత్సవాల వరకూ అప్పటి ఆదాయమే జీవాధారం అని చెప్పుకుంటుంటారు. ఇహ అసలు ఉత్సవం రోజు అయితే నాన్నగారు జాగ్రత్తగా అన్ని గ్రహాల ప్రభలూ కన్పించే మరియు మా ప్రయివసీకి భంగంకాని జాగాల్లో పిల్లలందర్నీ తీసుకెళ్ళి ఒక్కో ప్రభగురించి ఆ గ్రహం గురించే వివరంగా వర్ణించి చెప్పారు. ఆయన కళ్ళు దేనికోసమో వెతుకుతున్నట్లు అన్పించేది లేదా నేనలా అనుకున్నానేమో అన్ని గ్రహాల గురించిన ఆయన పరిజ్ఞానం అప్పుడు మా పిల్లలకు అబ్బురంగా తోచింది.

ఇలా దీర్ఘాలోచనలో మునిగిన ఈశ్వర్ వస్తున్న అడుగుల చప్పుడూ గమనించలేదు, ఇంకా ఈ ప్రభోత్సవంలో తను పోషించబోయే పాత్ర ఊహించలేదు.

“ఏమిటి ఇంకా నీలాకాశం చూడటం అవలేదా?” అంటూ రటోలే ప్రశ్నించేంత వరకూ ఈశ్వర్ ఈ లోకంలోకి రాలేదు. రటోలేని కూర్చోమని కళ్ళతోనే సైగచేసి తనుకూడా లేచి కూర్చున్నాడు.

”కొన్నింటి విలువ దూరమైతే గానీ తెలీదు కదా!”

”ప్లాట్ ఫామ్ పై నీలాకాశం ఎప్పుడూ చూసినట్టు గుర్తులేదు.

”ఫ్లాట్ ఫామ్ పై కాదు, భూమిపై. నాన్నగారితో పాటు అక్కడ ఓపెన్ లైబ్రరీలలో గడిపిన రోజులు నేను మర్చిపోలేకపోతున్నాను. నీలాకాశం అంటే అంతులేని ఉద్విగ్నత కలుగుతుంది”

రటోలె కొద్దిసేపు ఏమీ మాట్లాడలేదు. తర్వాత ”ఈ రోజు రాత్రి అత్యవసర సమావేశం ఏర్పాటు చేశారు” అంటూ తను వచ్చిన పని బయటపెట్టాడు.

”రాత్రి సమావేశమా!” అంటూ ఈశ్వర్ ఆశ్చర్యపోయాడు. యుద్ధం ముగిసిన తర్వాత ఇదే మొదటి రాత్రి సమావేశం అవుతుంది. ”ఏమన్న సమస్యా?” అంటూ రటోలెని ప్రశ్నించాడు. ”నాకు తెలీదు” అని రటోలె జవాబిచ్చాడు. ఇటువంటప్పుడుకానీ రటోలె మనిషికాదు రోబోట్ అన్న విషయం టక్కుమని స్ఫురించదు ఈశ్వర్ కు. ఇదే ”పాలాసి” అయితే ఏం బదులిస్తుంది? తినబోతూ రుచి అడగటం ఎందుకు అంటుందేమో!

                   ***

రాత్రి భోజనంలో పింపల పండ్లు, పింపల పాలు తీసుకొని అత్యవసర సమావేశానికి రటోలెతో కలిసి హాజరయ్యాడు. అక్కడ అప్పటికే మరతం, మాస్టర్ హాపీ, యువరాజు నికేతన్, యువరాణి పాలాసి ఉన్నారు. వారి వెనుక పెద్ద పాంపి గ్రహ ఝండా. పాంపి గ్రహం ఆ గ్రహంపై పింపల వృక్షంతో ప్రదర్శించబడివుంది.

ఈశ్వర్ వెళ్ళేసరికి అదొక సంతాపసమావేశంలా వుంది. ఎవరూ ఏమీ మాట్లాడటంలేదు. అందరి మొహాలూ ఏదో కోల్పోయినట్లున్నాయి. అకస్మాత్తుగా ఈ కొత్త సమస్య ఏమిటో అనుకున్నాడు ఈశ్వర్. తనూహించినట్లే మాస్టర్ హాపీ ముందు నిశ్శబ్దాన్ని భగ్నం చేశాడు.

“మనకో పెద్ద సమస్యవచ్చింది” అంటూ ఈశ్వర్ వైపు చూశాడు.

”ఏమిటది?” అంటూ రటోలె ప్రశ్నించాడు.

”ఇది 20k20 గెలాక్టిక్ సంవత్సరం కదా! మనగ్రహం నుండి భూప్రభోత్సవానికి ప్రబ్బండి పంపాలి. కానీ మరతం వాళ్ళ ప్లాగ్-షిప్ ను నికేతన్ వాళ్ళ ఫ్లాగ్ షిప్ యుద్దంలో నాశనం చేసింది.

ఆతర్వాత నికేతన్ ఫ్లాగ్ షిప్ ను మీరు నాశనం చేశారు. మనకిప్పుడు సరైన ప్రబ్బండి లేదు.”

“ఈ సంవత్సరం పాల్గొనకుంటే సరి” అంటూ మరతం బదులిచ్చింది.

”అలా ఎలా కుదిరిద్ది? మేం అధికారంలో వుండగా ఒక్కసారికూడా మిస్ అవ్వలేదు. నాన్నగారు చాలా గర్వంగా చెప్పేవాళ్ళు ఈ ఉత్సవం గురించి. షిప్ వెళ్ళాలి, షిప్ తో పాటు రాయల్ బ్లడ్ కూడా వెళ్ళాలి. వెళ్ళకుండా ఉండలేము.”

”మరోషిప్ కొంటే పోలా!” పాలాసి వంతపాడింది.

”షిప్ లేమీ పింపల చెట్టుకు కాయవు. మనం ఇంత అర్జంటుగా మరోషిప్ కొనాలంటే వేలూ గ్రహంలోనే లభ్యం. అంత సొమ్ము వాళ్ళకి తగలేసే బదులు పునర్నిర్మాణానికి వాడటం ఉత్తమం.” మరతం వాక్యం పూర్తి చెయ్యకముందే యువరాజు, యువరాణి యిద్దరి మొహాలూ కోపంతో ఎర్రబడ్డాయి.

వాళ్ళేమీ మాట్లాడకముందే మాస్టర్ హాపీ నోరు తెరిచాడు.

”నా సూచన కూడా- పాంపి గ్రహం ఈ ఉత్సవాలలో పాల్గొనాలనే. గత కొద్ది రోజులుగా నేను నికేతన్ తండ్రిగారి హయాములోని ఆర్ధిక లావాదేవీలు చూస్తున్నా. ఎక్కువ వ్యాపార ఒప్పందాలు ఈ ఉత్సవాలప్పుడు భూమిపైననే కుదిరాయి. మీ నాన్నగారు బహుతెలివైన వారు. ఇప్పుడు మనం పాంపి తరపున ప్రబ్బండి పంపించకుంటే భవిష్యత్తులో తేరుకోలేని నష్టంగా మారవచ్చు.”

”కానీ మనదగ్గర అంత సొమ్ములేదు కదా!” (మరతం)

”అప్పు చేద్దాం” అంటూ యువరాజు బదులిచ్చాడు.

”ఇప్పుడు మన గ్రహ ఆర్ధిక పరిస్థితికి కొత్త అప్పులు పుట్టడం కష్టం. పుట్టినా ఆ నియమాలు బహు కఠినంగా ఉంటాయి. అప్పు చెయ్యకుండా ఉండటానికే నేను ఇష్టపడతాను.” (మాస్టర్ హాపీ)

”పోనీ ఏదన్నా  ఇతర షిప్ లు పంపితే” (పాలాసి)

”సర్లే. ఇంకా మంచి షిప్ లే వుంటే యుద్ధంలో ఈ ప్రబ్బండినెందుకు బయటకు తీస్తాం చెప్పు?” (నికేతన్)

”పోనీ నా షిప్ పంపితే?” (ఈశ్వర్)

”అలా ఎలా పంపుతాం? పాంపి గ్రహ షిప్పే పంపాలి.” (నికేతన్)

”భేషుగ్గా పంపించవచ్చు. ఈశ్వర్ నా దత్తపుత్రుడన్న విషయం మీరు మర్చిపోతున్నారు. పాంపి గ్రహం నీకు ఎంత హక్కో ఈశ్వర్ కూ  అంతే హక్కు.” (మరతం)

”కానీ ఆషిప్ సరిపోతుందా?” (పాలాసి)

”నాషిప్ ను తక్కువ అంచనా వెయ్యొద్దు” గతంలోని సంఘటనలు కళ్ళముందు మెదుల్తుండగా ఈశ్వర్ బదులిచ్చాడు.

”ఈ ఐడియా బాగానే వుంది. ఒక్కసారి పోయినసారి వెళ్ళిన వాళ్ళు నీ షిప్ చూసి ఒకే అంటే మాకు ఎటువంటి అభ్యంతరం లేదు. కానీ ఆ షిప్ లో పాలాసి కూడా వెళ్ళిరావాలి ఉత్సవానికి.” (నికేతన్)

“నేనా? నేనెందుకు” (పాలాసి)

”రాయల్ బ్లడ్ కూడా ఉండాలి అనేది నియమం. నేనిక్కడ పునర్నిర్మాణం వదిలి రాలేను. అందుకని నువ్వే వెళ్ళిరావాలి” (నికేతన్)

”మా దత్త పుత్రుడు ఈశ్వర్ కూడా మా తరపున వెళ్ళిరావాలి.” (మరతం)

                ***

నా షిప్ ను తక్కువ అంచనా వెయ్యొద్దు అని అన్నాడుకానీ జరిగిన మార్పును ఈశ్వరే నమ్మలేకపొయ్యాడు. ఏమీ చెయ్యకుండా కేవలం ప్రబ్బండి మోడ్ సెలక్ట్ చేశాడు. అకస్మాత్తుగా షిప్ రూపం మారిపోయింది. అలంకరణ మారిపోయింది. షిప్ పైన ఎత్తైన ప్రభ మొలిచింది. ప్రబ్బండి కోసమే ఈ షిప్ తయారుచేశారా అనిపించేట్టు తయారైంది. యుద్దంలో దాని పాటవం  చూసి యుద్దం కోసమే తయారు చేశారా అనుకున్నాడు. ఇప్పుడిలా. గత ఉత్సవంలో చాలా ప్రబ్బండ్లు ఇంకా ఈశ్వర్ జ్ఞాపకాల్లో పదిలంగా ఉన్నాయి. వాటిలో చాలా వాటితో పోలిస్తే ఈ షిప్ అద్భుతంగా ఉంది.

షిప్ పరిశీలించడానికి నికేతన్ తరపున వచ్చిన వాళ్ళంతా ఆనందాశ్చర్యాలకు లోనయ్యారు.

వాళ్లలో కొంతమంది ఈ షిప్ కలిగించబోయే సంచలనం భూప్రభోత్సవంలో అప్పటికే  అర్థం అయింది.

ఈశ్వర్ కు ఒక్కసారిగా నిస్సత్తువ ఆవరించుకుంది. తండ్రి ఆఖరి ఆజ్ఞ “సుగుణాభిధామ్” చేరుకో, కానీ దాని గురించిన ఎటువంటి సమాచారమూ లభించడంలేదు. అంతలోనే తనకు తానే ధైర్యం చెప్పుకున్నాడు- ఈ భూప్రభోత్సవాలలో అయినా తనకో దారి కన్పిస్తుందేమో అని.

                 ***

తర్వాత చక చకా జరిగిపొయ్యాయి పనులు వ్యాపారవేత్తలతో, కవులతో, బాడీగార్డులతో, పనివాళ్లతో, వంటవాళ్లతో, జర్నలిస్టులతో, ఎడిటర్లతో, ధనవంతులతో, అదృష్టవంతులతో అందరితో కలిసి కోలాహలంగా ప్రయాణం మొదలైంది. ప్రతి ఒక్కరూ షిప్ గొప్పతనం మాట్లాడుకోవటంలోనే ప్రయాణంలో మొదటి సగం గడిపారు. ఆ తర్వాత గతంలో భూప్రభోత్సవాలకు వెళ్లి వచ్చిన వాళ్లు కొత్త వాళ్లకు ఆ భూప్రభోత్సవాల మహిమలు వివరిస్తూ మరింత ఆసక్తికరం చేశారు. ఈ ఘోష్టులలో ఈశ్వర్ కూడా ఆసక్తిగా పాల్గొన్నాడు. ఎన్నో కొత్త విషయాలు తెలుసుకున్నాడు. కొన్ని అతిశయోక్తులూ కొట్టిపడెయ్యకుండా విన్నాడు. అన్నింటికంటే అతిశయోక్తి నూరు సంవత్సరాల క్రితం జరిగిందని చెప్పబడింది – ఈ నాటి టెక్నాలజీకి కూడా ప్రభ పదహారు తాళ్ల ఎత్తు వెలిగితే అదే ఘనం. అటువంటిది నూరు సంవత్సరాల క్రితం నూటపదహారు తాళ్ల ఎత్తు వెలిగింది అని చెప్పుకున్నారు.

ఇంతలోనే ప్లాట్ ఫామ్ 7 వచ్చింది. ఇక్కడే అందరూ తొలిసారి ఆగాలి. ఈ ప్లాట్ ఫామ్ లపై వేచి వుండి అన్ని అనుమతులూ వచ్చిన తర్వాతనే భూమిపైకి వెళ్లాలి.

అక్కడనుండి ఈశ్వర్ స్వంత ప్లాట్ ఫామ్ 9 చాలా దగ్గర. కానీ వెళ్లడానికి తటపాయించాడు. చివరకు ప్లాట్ ఫామ్ 9 వద్దకు వెళ్లాడు. అతనితోపాటు రటోలె కూడా ఉన్నాడు. వీళ్లు ఏమీ చెప్పకుండా వెళ్తున్నారని, యువరాణి పాలాసి కూడా వాళ్లకు తెలియకుండా అనుసరిస్తుంది. కానీ అలా చెప్పకుండా అనుసరించడమే వాళ్ల ప్రాణాలు కాపాడింది. ప్లాట్ ఫామ్ 9 కు వెళ్లగానే ఈశ్వర్ భోరుమని ఏడ్చాడు. పాలాసి దూరం నుండి ఆశ్చర్యంగా చూసింది. ఈశ్వర్ ఏడవగా ఆమె ఇప్పటివరకూ చూడలేదు. అసలు తనకు తెలిసిన ఈశ్వరేనా అనిపించింది. ప్లాట్ ఫామ్ 9కు 7కు పోలికే లేదు. ప్లాట్ ఫామ్ 9 ఒక స్మశానంలా వుంది. అక్కడ ఒక్క జీవి కూడా లేదు. అలా అనుకుంటూ వుండగానే పాలాసి ఈశ్వర్ వెనుకగా దూరంగా ఏదో కదలిక. పాంపి గ్రహంలో యుద్ధవిద్యల్లో సుశిక్షితురాలైన యువరాణి మరొక్క క్షణం కూడా ఆలస్యం చేయకుండా తన ఎయిమర్ వాడింది. ఆ శబ్దానికి అక్కడ నిశబ్దం భగ్నమైంది. రొటోలె కూడా తన ఏయిమరుకు పని చెప్పాడు. ఈశ్వర్ వేగంగా కవర్ తీసుకున్నాడు. కొంత సేపటివరకు ఎటువంటి శబ్దం రాలేదు. రొటోలె ముందుకు వెళ్లి పడిపొయిన శరీరాలు చూశాడు. “గార్డ్ బాట్స్” అంటూ వాటి చెవుల్లోకి తన వేలు పోనిచ్చాడు. తద్వారా వాటికి ఇవ్వబడిన కమాండ్స్ మొత్తం చదివాడు. “మనం ఇక్కడ నుంచి త్వరగా వెళ్లాలి. ఇవి మనం ఇక్కడకు వచ్చిన విషయాన్ని వాళ్ల కంట్రోల్ సెంటర్ కు తెలిపాయి”, అంటూ ఈశ్వర్ ను తీసుకొని పాలాసి వద్దకు వచ్చి ఆమెతో పాటు వేగంగా ప్లాట్ ఫామ్ 7 వద్దకు వచ్చాడు.

పాలాసి ధైర్యంగా రియాక్ట్ అయింది గానీ భూప్రభోత్సవాలప్పుడు హింస పూర్తిగా నిషేధం. మనుషులకైనా, బాట్స్ కైనా. ఇలా ఎలా జరిగింది అని ఆలోచించసాగింది. ఏమీ అడక్కుండానే ఈశ్వర్ ఏమన్నా చెపుతాడేమో అని చూసింది కానీ ఈశ్వర్ ఏదో లోకంలో ఉన్నట్టున్నాడు. పాలాసి కూడా అని కళ్లల్లోకి ఒక్క క్షణం సూటిగా చూసి ఆ తర్వాత తన కాబిన్ వైపు వెళ్లిపొయింది.

రొటోలె మరింత అప్రమత్తంగా వుంటూ చుట్టూ పరిసరాలు కదలకుండానే స్కాన్ చెయ్యసాగాడు. షిప్ కంప్యూటరుతో ఇక్కడ జరిగిన సంఘటనలన్నీ పంచుకున్నాడు. షిప్ కంప్యూటరు నుండి వచ్చిన రెస్పాన్స్ అతన్ని ఆశ్చర్యపరిచింది.

“అయితే సమయమాసన్నమైందన్నమాట! ” అన్నది షిప్ కంప్యూటరు. అంతకంటే ఎక్కువ చెప్పడానికి ఎటువంటి ఆసక్తీ చూపలేదు. ఇటువంటప్పుడే రొటోలెకు మనుషుల్లా కోపం లాంటిది వస్తుంది. కానీ షిప్ కంప్యూటరును ఏమీ చెయ్యలేడు అందుకే గమ్మునున్నాడు.

అన్ని రకాల అనుమతులూ రావడానికి మొత్తం మూడు రోజులు పడతాయి. ప్లాట్ ఫామ్ 7 నుండి షిప్ నేరుగా భూమిపైకి తీసుకెళ్తారు. అక్కడ లంకా ద్వీపం వీరికి ఆతిథ్యం ఇస్తుంది. ఈ ఆతిథ్యం పూర్తి ఉచితంగా ఇస్తారు. ఎటువంటి అదనపు బాధలూ లేవు. భూమి తల్లిలాంటిది. తల్లి కడుపులోకి వెళ్లేంతవరకే శిషువు పని ఆతర్వాత అంతా తల్లే చుసుకుంటుంది. అలానే భూమిపైకి వెళ్లేంతవరకే వీళ్ల పని, అక్కడికి వెళ్లాక అంతా భూమే చూసుకుంటుంది.

ఆ తర్వాత కొన్ని రోజులకే అసలు సందడి మొదలైంది. అక్కడ ప్రబ్బండి ఎత్తు (షిప్ లు లేజర్ లైటింగ్ తో ఈ ప్రభను  అందంగా ప్రొజెక్ట్ చేస్తాయి) అందరికీ ముడు తాళ్లు వుటుంది. కావాలంటే రెండు తాళ్లవరకూ తగ్గించుకొని ఒక భాగం వేరే షిప్ వాళ్లకు అమ్ముకోవచ్చు. కానీ ఎవరూ అలా చెయ్యరు. అందరూ మరింత ఎత్తు పెంచుకోవాలనే చూస్తారు. మూడు తాళ్ల తర్వాత కూడా ఎత్తు పెంచుకోవాలంటే ఎత్తుకింతని భూ ప్రభోత్సవ కమిటీకి పే చెయ్యాలి. ఈ ప్రాసెస్ అంతా ఆటోమేటిక్ అంటే షిప్ కంప్యూటర్ నుండి పే చేసి ఎత్తు పెంచుకోవచ్చు పే చెయ్యకుండా ఎత్తు పెంచితే ఆ షిప్ ను ప్రోసెసన్ నుండి తొలగిస్తారు. ఉత్సవ ప్రోసెసన్ డిల్లీనుండి యూరోప్, ఆఫ్రికా అమెరికా అలా తిరిగి జపాన్, చైనా, బర్మా, ఆపై చివరగా విజయనగరం వస్తుంది. మొత్తం 30 రోజుల ఉత్సవం. ఎత్తు ఏరోజుకి ఆరోజే పే చెయ్యాలి, కావాలంటే నెల మొత్తానికి పే చెయ్యవచ్చు.

చిన్న చిన్న సంఘటనలే పెద్ద పెద్ద మార్పులకు కారణమవుతాయి. ఉత్సవం మూడవ రోజు జరిగిందా సంఘటన. యువరాణి పాలాసిని చూసి డికులా గ్రహ కమాండర్ మనసు పారేసుకున్నాడు. యువరాణిని ఆకర్షించాలని పలు రకాలుగా ప్రయత్నించసాగాడు. డికులా గ్రహం ఇక్కడ వచ్చిన అందరిలోకి సిద్ధంగా వచ్చంది. మొదటి మూడు రోజులూ అందరికంటే ప్రభ ఎత్తు వీరి షిప్పుదే.

యువరాణికి తొలిచూపులోనే ఈ డికులా కమాండర్ అంటే అసహ్యం పుట్టింది. కారణమంటూ ఏమీ లేదు. అతని నీడ పడ్డా కూడా ఒళ్లంతా జలదరించసాగింది. మూడవ రోజు రాత్రి యువరాణి పాలాసి, రొటొలె, ఈశ్వర్ పర్షియా వ్యాహాళికి వెళ్లి వస్తుంటే, డికులా మరింత రెచ్చిపొయ్యాడు. ఈశ్వర్ ఒక్కటంటే ఒక్కటి ఇచ్చాడు. కానీ కమాండరుకు చీమ కూడా కుట్టినట్టు లేదు. మరింతగా పాలాసిపై పడసాగాడు. ఈశ్వర్ ఈ సారి ఎయిమర్ తిప్పి తలపై కొట్టాడు.

కొట్టాను అనుకున్నాడు. కానీ కమాండర్ ఒక్కసారిగా వేగంగా తిరిగి అదే ఎయిమర్ లాక్కుని ఈశ్వర్ పొట్టలో పొడిచాడు.

దెబ్బ బాగా గట్టిగానే తగిలేదు, కానీ క్షణంలో రొటోలె ఎయిమర్ లాక్కున్నాడు.

కమాండర్ కోపం నషాళానికి అంటింది. కానీ రొటోలె వైపు చూసి కంట్రోల్ చేసుకున్నాడు.

భూమికి మూడు తాళ్ల ఎత్తు ప్రభ, మూడు మూరల ఎత్తు బాయ్ ఫ్రెండ్ ఎందుకంత మిడిసిపాటు. అని యువరాణివైపు మాటలు విసిరుతూ వేగంగా అక్కడనుండి మైయమైపొయ్యాడు.

యువరాణి పాలాసికి ఒళ్లంతా వణికి పొయింది. వీడు వీడి ప్రభ రెండూ మనముందు దిగదుడుపు కావాల్సిందే. అంటూ ఈశ్వర్ రెండు చేతులూ పట్టుకుని గట్టిగా వూపుతూ అంది. ఈ ఒక్కసారికీ ఈశ్వర్ పాలాసితో ఏకీభవించాడు.

* * *

ప్రతి రోజూ యువరాజు షిప్ కంప్యూటరుకు ఒకటే కమాండ్ ఇవ్వసాగాడు. ప్రభ అందరికంటే ఎక్కువ ఎత్తు వుండాలి అని.

యువరాణి ప్రోత్సాహంతో షిప్ లోని ధనవంతులు కూడా విరివిగా విరాలాలు షిప్ కంప్యూటరు వైపు మళ్లించసాగారు. యుద్ధం తర్వాత రాజుల వద్ద కంటే వ్యాపారుల వద్ద ఎక్కువ నిధులు వుంటాయి కదా. వరుసగా నాలుగు, ఐదు, ఆరు రోజులు కూడా షిప్ కంప్యూటరు ప్రభను అన్ని షిప్ ల కంటే ఎక్కువ ఎత్తులో వుంచింది. డికులా కమాండర్ ఆవేశానికి లోనవసాగాడు. తను ఎంత ఎమౌంటు పే చేసినా పాంపి షిప్ అంతకంటే ఎక్కువే పే చెయ్యసాగింది గడువులోపలనే. ఎన్ని రకాల ట్రిక్కులు ప్లే చేసినా దాని ముందు నెగ్గడం వీలవడంలేదు.

ఆ తర్వాత పాంపి వ్యాపారస్తులు ఊహించినవి జరిగాయి. మాస్టర్ హాపీ మాత్రం హాపీగా ఫీలయ్యాడు. అతని లెక్కన్నీ కరక్టయినందుకు. పాంపి గ్రహం ఎక్కువగా అమ్మేది రెండే రెండు ఒకటి పింపల రసం, రెండు పాంపి యాత్రం. యుద్ధం కారణంగా రెండింటికీ పెద్ద డిమాండ్ లేకుండా పొయింది. కానీ వరుసగా ముడు రోజులు పాంపి గ్రహ ప్రభ వెలిగిపోవడంతో ఒక్కసారిగా రెండింటికీ డిమాండ్ పెరిగిపొయింది. పింపల రసం అడ్వాన్స్ బుకింగులు మొత్తం గత ఐదు సంవత్సరాల అమ్మకాలు మొత్తం ఒక్క రోజులో జరిగాయి. ఇహ పాంపి టూరిజమ్ గురించి అయితే చెప్పనవసరంలేదు.

ఈ పోటీ మొత్తం ఇరవై తొమ్మిది రోజులూ జరిగింది. మెజార్టీ రోజులు పాంపి ప్రభే అత్యంత ఎత్తులో వెలిగింది. ఇహ చివరి రోజు… డికులా సర్వ శక్తులు ఒడ్డ సాగాడు. ఈ చివరి రోజు ప్రత్యేకత ఏమిటంటే మామూలు రోజులా పే చెయ్యడం ఒక గడువులో ముగియదు. పోటీ ముగిసే వరకూ పే చెయ్యవచ్చు. ప్రభ ఎత్తు ఎప్పుడైనా పెంచుకోవచ్చు. అన్నింటికంటే ఆసక్తికరమైన రోజు ఇదే. డికులా గ్రహం అంతకంతకూ ఎత్తు పెంచసాగింది. పాంపి కూడా పోటీ పడసాగింది. కానీ నగదు నిల్వలు త్వరగా కరిగిపోసాగాయి.

రాకుమారి నకులు కూడా వేలం వేస్తుంది. అయినా డికులా గ్రహం కంటే ఒకతాడు వెనుకే వుంటారు. ఎలా చేస్తున్నారో ఏమో గానీ డికులా ప్రతి క్షణం పాంపి కంటే ఎక్కువే పే చెయ్యసాగింది. ఇహ గెలుపు డికులా గ్రహానిదే అనుకుంటున్నప్పుడు అకస్మాత్తుగా షిప్ ఆటోమేటిగ్గా నగదు రహస్య అకౌంట్ లోనుండి భుప్రభోత్సవ కమిటీకి ట్రాన్సఫర్ చేసి ప్రభ ఎత్తు ఇబ్బడి ముబ్బడిగా పెంచుతుంది.

ప్రభ కూడా అప్పటివరకూ పాంపిగ్రహ ఝండా చూపేదల్లా, బంగారు పుష్పం మరియు పాంపి గ్రహ ఝండా మార్చి మార్చి చూపసాగింది.

ఈశ్వర్ ఆశ్చర్యంగా ఆప్రభవైపు చూస్తుంటే రటోలె- మీ స్వంత గ్రహ ఝండా అంటూ చెప్తాడు.

ఆశ్చర్యకరంగా చాలా షిప్ లు గౌరవ సూచకంగా తమ ప్రభల సైజు సగానికి తగ్గించుకొని ఆ అమౌంట్ కూడా వీళ్ల షిప్ ఖాతాలోకి పంపుతాయి. డికులా గ్రహ ప్రబ్బండి కంటే ఈశ్వర్ షిప్ ప్రభ చాలా ఎత్తు ఎగురుతుంది. నూటపదహారు తాళ్లను మించిపోతుంది.

* * *

posted by chavakiran in కథ,తెలుగు,తెలుగు సైన్స్ ఫిక్షన్ and have No Comments

SEO tool book marks

I am bookmarking few links I may need in future.

All my online bookmarks are never actually working 🙂

http://ubersuggest.org/

 

https://mural.ly

 

https://trello.com/tour

 

http://www.majesticseo.com/

 

https://ahrefs.com/

posted by chavakiran in SEO and have No Comments

A quick way to create sitemaps

http://www.xml-sitemaps.com/ 

This seems to be generating good sitemaps, provided your site is well organized.

posted by chavakiran in SEO and have No Comments

traffictravis.com Looks interesting

Check out http://www.traffictravis.com/

I just started exploring. Will update once I have more to add.

posted by chavakiran in SEO and have No Comments

WordPress default RSS widget – make not to display entries in chronological order

WordPress RSS feed widget displays feed entries in chronological order.

But some times it is better to display the entries in the order they appear in feed.

For example Popular books of the week.

To do so, make below changes to core wordpress.

Filename = feed.php

function = fetch_feed()

before $feed->init add below line:

$feed->enable_order_by_date(false)

reference: http://simplepie.org/wiki/reference/simplepie/enable_order_by_date

 

ps: It is bad idea to change core wordpress. Until you find a plugin it is a quick fix.

posted by chavakiran in English,Wordpress and have No Comments

ఊరుకో ఊరుకో ఊర్మిలమ్మ నిదురపోతున్నదీ

ఊరుకో ఊరుకో ఊర్మిలమ్మ నిదురపోతున్నదీ,
ఊరుకో ఊరుకో లక్ష్మణుడు వేటకెళ్లాడు.

ఊరుకో ఊరుకో సీతమ్మ సింగారించుకుంటున్నది.
ఊరుకో ఊరుకో రాములోరు రాజకార్యాల మునిగారు.

ఊరుకో ఊరుకో నానులంతా సరయుకెళ్లారు.
ఊరుకో ఊరుకో హనుమ తపమునున్నాడు.

ఊరుకో ఊరుకో వాల్మీకు ఉత్తరానికేగాడు.
ఊరుకో ఊరుకో వశిష్టుడు దక్షిణానికేగాడు.

ఊరుకో ఊరుకో ఊర్మిలమ్మ నిదురోతున్నదీ.
లాలి లాలి లవుడా, లాలి లాలి.

posted by chavakiran in కవిత,తెలుగు and have No Comments

గిల్గమేశుడు

గిల్గమేశుడు ఉరుక్కు నగర వీరాధివీరుడు, కత్తిని నమ్మినవాడు, భుజబలంలో సాటి లేనివాడు, బుద్ది బలంలో మేటి వాడు, ఉరుక్కు నగర నిర్మాత, రెండు వంతులు మానవాంశ, ఒక వంతు దైవాంశ కలవాడు, స్వర్గ ద్వారాలు చూసి వచ్చినవాడు, తిరుగులేని వాడు, మడమ తిప్పని వాడు, బహు సుందరాంగుడు, అతి విశాల దేహం కలవాడు, ముందు చూపున్నవాడు, మేరు గంభీరుడు, పదులా — ఇరవైలా ? ఇలా పలు సుగుణాలు రాశిగా కలవాడు గిల్గమేశుడు.

సుమేరియన్ దేశపు రాజు, నేటికి సుమారుగా ఐదువేల సంవత్సరాల ముందటి వాడు, తన చరితను రాజ్యమంతా రాతి ఫలకాలపై వ్రాయించిన వాడు. ఇప్పటి వరకు మనకి లభించిన లిఖిత కథలలో ఇదియే పురాతనమైనట్టిది. ఈ కథల నుండి తరువాతి నాగరికతల గాథలు చాలా ప్రభావితమైనాయి. అట్టి ఉన్నత లక్షణములతో కూడిన గిల్గమేశుని కథ
తెలుసుకుందాం.

 

జననం

క్లుప్తంగా చెప్పాలంటే గిల్గమేశుని, దేవాదిదేవుడయిన అను ఆజ్ఞపై, సృష్టికి అధిదేవత అయిన అరురు దేవత — రెండు వంతులు దైవాంశతోను, ఒక వంతు మానవాంశతోనూ సృష్టించింది. సూర్య భగవానుడు ఆ దేహానికి అందాన్నిస్తే, తుఫానుల అధిదేవత అయిన అదదుడు ధైర్యాన్నిచ్చాడు.

ఉరుక్కు నిర్మాణం, పాలన, విజయం

గిల్గమేశుని కాలానికి ఉరుక్కు నగరం అంతకు క్రితం వచ్చిన మహా జల ప్రళయంలో పూర్తిగా నాశనం అయింది. గిల్గమేశుని ముందు వచ్చిన రాజులు నగరానికి పూర్వ వైభవం తీసుకొని రావటంలో పూర్తిగా విఫలం అయ్యారు. అటువంటి పరిస్థితుల్లో మహా వీరుడైన గిల్గమేశుడు తన సోదరులతో కూడి, గొప్ప సైన్యాన్ని ఏర్పాటు చేసుకొని రాజ్యాన్ని ఏక తాటిపై నడిపించాడు. చెట్టుకొరకు, పుట్టకొకరు అయిన రాజ్య ప్రజలను ఒక్క చోటుకు చేర్చాడు. శతృవులను క్రూరంగా అణిచివేశాడు. మృగాలను
తరిమేశాడు. అడవులను వాస యోగ్యం చేశాడు. అన్నింటికంటే ముఖ్యమైనది ఉరుక్కు నగరాన్ని మహా నగరంగా తీర్చిదిద్దాడు. దుర్భేద్యమైన కుడ్యాలు నిర్మించాడు. ఆ నగరానికి ఏడు గడియలతో సింహ ద్వారాన్ని ఏర్పాటు చేశాడు. సప్తర్షులు వేసిన పునాదులపై కొత్త నగరాన్ని విజయవంతంగా పూర్తిచేసి, జనులందరూ ఆనందాశ్చర్యాలకు
లోనగునట్లు నగరాన్ని తీర్చిదిద్దాడు.

నగరాన్ని మూడు భాగాలుగా విభజించాడు. ఓ భాగంలో మనోహర భవనాలు, రెండవ భాగంలో నయనారవింద తోటలు, మూడవ భాగం మట్టి దిబ్బలుగా వదిలేశాడు.

ప్రజలంతా ఈతి బాధలు లేకుండా ఎవరి లక్ష్యాలవైపు వారు జీవన యానం సారించారు. క్రూర మృగాల బాధ లేదు, దుష్ట మాంత్రికుల బాధ లేదు, దేవతలు కూడా ఆనందించి అందరికీ అన్నీ అందించసాగారు.

ఎల్లప్పుడూ పరిస్థితులు ఒకే లాగా ఉండవు కదా, గిల్గమేశుడు ఎదురులేని వాడైనాడు. నగర ప్రజలు అతని గురించి బయట ఏమీ చెప్పే ధైర్యం లేనివారైనప్పటికీ ఇంటి లోపల మాత్రం “గిల్గమేశుడు చేతికందివచ్చిన ఏ కొడుకునీ తండ్రికి వదలడు,
ఏ సుందరాంగినీ పెండ్లి కూమారునికి వదలడు” అని చెప్పుకోసాగారు.

ఇవన్నీ విన్న దేవాధిదేవుడు ‘అను’, సృష్టికి అధిదేవత అయిన అరురుని పిలిచి, గిల్గమేశునికి పోటీగా, వానికి సమ ఉజ్జీగా మరొకరిని సృష్టించమని ఆజ్ఞాపిస్తాడు, తద్వారా వారిద్దరూ కలిసి పోరాటాలు చేసి ఉరుక్కు నగర ప్రజలు
గుండెలమీద చెయ్యి వేసుకొని హాయిగా ఉండగలుగుతారు అని చెప్తాడు.

ఈ ఆజ్ఞలు గైకొని అరురు దేవత, ‘అను’ ప్రతిబింబాన్ని తన హృదయంలో ఉంచుకొని చేతులు కడుక్కొని, మట్టి ముద్ద తీసుకొని, వీరుడైన ‘ఎంకిడు’ని సృష్టించింది. అతను యుద్దానికి అధిదేవత అయిన నినుర్తా వలె యుద్ద వీరుడు, అతని శరీరం వెంట్రుకలతో నిండి ఉంది. తల అయితే అమ్మాయి జుట్టులా ఉంది.

ఈ ఎంకిడుకి కొంపా గోడు ఏమీ లేవు. అడవిలో పడి ఒక జంతువులా తిరిగేవాడు. పులులపై స్వారీ చేసేవాడు. సింహాలతో ఆడుకునేవాడు. జంతులతో గెంతు లేసేవాడు.

ఓ రోజు ఏమయిందంటే, ఓ వేటగాడు ఇదే అడవికి వేటకు వచ్చి జలపాతం దగ్గర మాటు వేశాడు. కానీ ఎండికు తన సింహాలతో వచ్చి వాణ్ణి తరిమేశాడు. రోజూ ఇలాగే జరగసాగింది. ఇహ లాభం లేదని ఆ వేటగాడు తన తండ్రయిన కోయ దొరకు చెప్పాడు.
“నాన్నా, అడవిలో ఓ అడవి మనిషి మా వేట సాగనివ్వటంలేదు. మేము వేసిన ఉచ్చులు తెంపేస్తున్నాడు. చిక్కిన జంతువులను వలల్లో నుండి బయటకు పంపిస్తున్నాడు. సింహాలతో వచ్చి మమ్మల్ని తరిమేస్తున్నాడు. ఇలా అయితే మనం ఉండలేము.”

కోయ దొర బాగా ఆలోచించి తన కొడుక్కి,  “నాయినా, నువ్వు ఇప్పుడే ఉరుక్కు నగరానికి వెళ్లి, రాజయిన గిల్గమేషున్ని కలుసుకో, కలుసుకొని మన పరిస్థితి వివరించు. అందమైన ఇస్తార్ దేవాలయపు నాట్యగత్తెను పంపి ఈ అడవి
మనిషిని అదుపులో ఉంచమను.” అని సలహా ఇచ్చి ఉరుక్కు నగరం పంపుతాడు. రాజు అలాగే ఓ తెలివైన అందమైన నాట్యగత్తెను పంపుతాడు. ఆమే ఎంకిడుని జలపాతం వద్ద కలుసుకుంటుంది. వారిద్దరి చూపులు కలుసుకుంటాయి. మొదట కుతూహలం, తరువాత ఆసక్తి, తరువాత అనురక్తి. ఆరు పగళ్లు, ఏడు రాత్రులూ క్షణాల్లా గడిచిపోతాయి.

తరువాత ఎంకిడు తన జంతువుల వైపు చూస్తాడు. అవి భయంతో దూరంగా పారిపోతాయి. వాటి వెనకాలే పరుగెత్తి పట్టుకోవాలని చూస్తాడు, కానీ కాళ్లు బలహీనం అవ్వటం వల్ల వీలు కాదు. అప్పుడు నాట్యగత్తె ప్రేమతో, అనునయంగా ఇలా చెపుతుంది. “ప్రియమైన ఎంకిడూ, నువ్వు అమోఘమైన బలసంపన్నుడవు. నీ ధైర్య సాహసాలు, తెగింపు అసమానమైనవి. ఉరుక్కు అనేది ఓ మహా నగరం. నీకు అదే తగిన స్థలం”

ఎంకిడు సంతోషంతో ఒప్పుకుంటాడు. ‘నేను అందరికంటే బలవంతుడనని ఉరుక్కు నగరం మొత్తం చాటుతాను’ అని పలుకుతాడు. వెంటనే నాట్యగత్తె గిల్గమేశుని గురించి చెప్పి అతను అమిత బలవంతుడని, అతనితో మంచిగా ఉండమని సలహా ఇస్తుంది.

ఇంకా ఆమే తన దుస్తులు సగం సగం చేసి ఒకటి ఎంకిడుకు ఇచ్చి మరొకటి తను ధరిస్తుంది. ఆ తర్వాత కోయ దొర ఇంటికి తీసుకొచ్చి, చక్కగా అలంకరించి, అందగా తయారుచేసి భోజనం చెయ్యడం వంటి నాగరిక లక్షణాలు నేర్పించి ఉరుక్కునకు
ప్రయాణం కడుతుంది.

ఇక్కడ పరిస్థితి ఇలా ఉంటే, అక్కడ ఉరుక్కు నగరంలో గిల్గమేశునికి రెండు కలలు వస్తాయి.

మొదటి కలలో ఓ గొడ్డలి గిల్గమేశునిపై పడుతుంది. గిల్గమేశుడు దాన్ని పైకి లేపలేడు, కదల్చలేడు. ప్రజలు దాని చుట్టూ మూగుతారు. గిల్గమేశుడు దానిని తన భార్యలాగా వాటేసుకొంటాడు.

రెండవ కలలో ఓ నక్షత్రం ఉరుక్కు నగర సభా స్థలం పై పడటం గిల్గమేశుడు చూస్తాడు. దానిని కూడా గిల్గమేశుడు భార్యలాగా కౌగిలించుకుంటాడు.

ఈ కలల అర్థాలు తెలుసుకోటానికి గిల్గమేశుడు అతని మాతృ శ్రీ దగ్గరకు వెళ్తాడు. తెలివైన నిన్సన్ దేవత కలల అర్థాలు ఇలా చెప్తుంది. ‘ఆ నక్షత్రం, గొడ్డలి త్వరలో రాబోతున్న నీ జతగాడు. అతను అమిత బలవంతుడు మరియు నీకు మంచి
మిత్రుడు అవుతాడు. అతను నిన్ను కష్టాలనుండి రక్షిస్తాడు, కానీ మధ్యలోనే విరమిస్తాడు. ’

ఎంకిడు తన ప్రయాణాన్ని కొనసాగిస్తాడు. దారిలో మరో బాటసారి కలిసి మాటలు కలుపుతాడు. అతను ఉరుక్కు రాజ్యాధినేత గిల్గమేశుని శౌర్య ప్రతాపాలు వేనోళ్ల పొగిడి, తరువాత అతను రాజ్య ప్రజలు ఇళ్లో అనుకునే మాటలు చెపుతాడు.
‘గిల్గమేశుడు యవ్వనంలోని ఏ యువకుణ్నీ తన తల్లిదండ్రులకు వదలడు, యవ్వనంలోని ఏ యువతినీ తన భర్తకు వదలడు’ ఆ మాట విని ఎంకిడు కోపంతో పళ్ళు పట పట కొరుకుతాడు.

ఎంకిడు నగర ప్రవేశం చేస్తాడు. అతణ్ని చూసి నగర వాసులు ఆశ్చర్యపోతారు. “అరె ఇతను అచ్చు మన గిల్గమేశ మహారాజులానే ఉన్నాడే, కాకుంటే కొంచెం ఎత్తు తక్కువ. కొద్దిగా బలంగా ఉన్నాడు. మొత్తానికి మన రాజుకి సరి
అయిన జోడీ” అని అనుకుంటారు.

అదే రోజు రాత్రి ఓ వివాహం. పెళ్లి కూతురు శోభనం గదిలోకి పంపబడ్డది. గిల్గమేశుడు తన భవనం నుండి బయల్దేరాడు. కానీ మొదటిసారిగా గిల్గమేశుని ఒకరు అడ్డుకున్నారు. దారికి అడ్డంగా ఎంకిడు!!

గిల్గమేశుని కళ్లు చింత నిప్పుల్లా అయ్యాయి. రౌద్రంతో ఊగిపోతాడు. ఒక్క వేటుతో ఎంకిడుని దారినుండి అడ్డు తొలగించి వేద్దామని చూస్తాడు. పోరాటం మొదలయింది. ఇద్దరూ చేతులు పట్టుకోని ఒకరినొకరు బలంగా వెనక్కి నెడుతూ ప్రత్యర్థిని పడెయ్యాలని చూశారు. నగర వాసులు భయంతోనూ, ఆశ్యర్యంతోనూ నలు మూలలకు పరుగులు తీశారు. దేవతలు కూడా ఆ అపూర్వ పోరాటం చూడసాగారు.

ఇళ్ల తలుపులు పీకి ఒకరి పై ఒకరు విసురుకున్నారు. గోడలు అదిరాయి. చూసేవారికి రెండు ఎద్దులు పోరాటంలాగా కన్పించింది. ఓ సమయంలో ఎంకిడు కొద్దిగా పై చేయి సాధించాడు. అప్పుడు ఎంకిడు తన మోకాలును నేలకు ఆనించి తల
ఎత్తి గిల్గమేశునివైపు చూసి “గిల్గమేశా ప్రపంచంలోనే నా అంతటి వాడు మరొకరు లేరు. నిన్ను మనుష్యులందరిలోకీ ఉన్నతునిగా దేవాధిదేవుడు సృజించాడు. అందుకనే నువ్వు రాజువయ్యావు. ఆ అనిల దేవుని ఆశీస్సులు పుష్కలంగా నీకున్నాయి. ”

ఈ మాటలు విన్న తరువాత గిల్గమేశునికి తన తల్లి మాటలు గుర్తు వచ్చాయి. అప్పటి నుండి వారిరువురు మంచి స్నేహితులయ్యారు. అంతే కాకుండా గిల్గమేశుని మాతృ శ్రీ ఎంకిడుని దత్తు తీసుకుంది. దానితో వారిరువురు
అన్నదమ్ములు కూడా అయ్యారు.

కాలం ఇలా గడచిపోతుంటే, ఓ రోజు ఎంకిడు గిల్గమేశుని దగ్గరకు వచ్చి “సోదరా! ఈ రాజ భోగాల మద్య నాకు ఏమీ తోచటం లేదు. బద్దకం పెరిగిపోతుంది.
యుద్దాలు లేక, ఎటువంటి ఆసక్తికరమైన పనులులేక కర చరణాలు బలహీనమవుతున్నాయి. యుద్ద కేకలు వేయక నా గొంతు ఉపయోగంలో లేకుండా పోతుంది. నా బలాలన్నీ బలహీనతలవుతున్నాయి. “అంటూ వాపోతాడు.

ఈ మాటలు వినంగనే ఉత్సాహవంతుడయిన గిల్గమేశుడు “అయితే దేవదారు వనానికి వెళ్లి, అక్కడి దేవ రాక్షసుడైన హుంబాబాని వధించి ఆ వనాన్ని మనం స్వాధీనం చేసుకుందాం” అంటాడు.

అంతే ఒక్కసారిగా ఎంకిడు ఉలిక్కిపడతాడు. అతని వెన్ను జలదరిస్తుంది. తరువాత కూడబలుక్కోని “సోదరా! సోయిలో ఉండే మాట్లాడుతున్నావా? హుంబాబాతో యుద్దమంటే పిల్లాటలా? దేవదారు వన ప్రవేశమే అసాధ్యమైంది. ఆ వనంలోకి
ప్రవేశించినా ఏడు రక్షక కవచాలతో ఉన్న హుంబాబాని ఎదుర్కోవటం పులి నోట్లో తల పెట్టడం ‍వంటిది. పోయి పోయి మిడతల వలే అగ్నిలో దూకుతామా? పిచ్చిగా ప్రవర్తిస్తామా? హుంబాబా అతి భయంకరమైన వాడు. అతని నోరు అగ్ని, అతని శ్వాస
స్వయంగా మృత్యు దేవత. అటువంటి హుంబాబాతో తలపడటమా? ఇహంలో ఉండే మాట్లాడుతున్నావా? ” అంటూ తన భయాల్ని నిస్సంకోచంగా బయట పెట్టి గిల్గమేశుని ప్రమాదకరమైన యుద్ద ప్రయత్నాన్నుండి మరల్చాలని చూస్తాడు.

కానీ గిల్గమేశుడు ఏ మాత్రం భయపడకుండా “సోదరా! ఎంకిడూ!! నువ్వేనా ఇలా మాట్లాడేది? ఈ దేహం అశాశ్వతమైనది. దేవతల్లా మనం నిరంతరమూ జీవంచబోవడంలేదు. అంత అదృష్టం మనకు లేదు. మనం దురదృష్టవంతులం. మన రోజులు లెక్కించదగ్గవి. అట్టి అశాశ్వతమైన జీవితం కోసం శాశ్వతమైన కీర్తిని వదులుకుంటావా? కేవలం మన
వీర కార్యాలు మాత్రమే మన్నీ భూమిపై శాశ్వతంగా జీవింప చేస్తాయి. హుంబాబా వంటి బలవంతులతో తలపడినప్పుడే కదా మనకు గుర్తింపు వచ్చేది. “అంటూ ఎంకిడు భయాలు పారద్రోలి, ధైర్యం చెప్పి, కర్తవ్యం వైపు నడిపిస్తాడు. చివరకు ఎంకిడు
అయిష్టంగానే అయినా ఒప్పుకుంటాడు. కానీ ఎంకిడు లాగానే అతని రాజ సభ మొత్తం ముక్త కంఠంతో వద్దు వద్దు అని

గిల్గమేశుని ప్రయత్నాన్ని ఆపాలని ప్రయత్నిస్తుంది. “రాజా! గిల్గమేశా మీరింకా యవ్వనవంతులే, అనుభవించవలసిన జీవితం చాలా ఉంది. రాజ్యాన్ని రక్షించవలసింది మీరే, అటువంటి మీరే ఇటువంటి ఆత్మహత్యా సదృశమైన దుస్సాహసానికి పూనుకుంటారా? మా పరిస్థితి ఏం కావాలి? భర్తలేని భార్యలాగా ఈ రాజ్యాన్ని అనాథను చేసి వెళ్తారా? హుంబాబా మామూలు మనిషి లాంటి వాడు కాదు. అతన్ని ఏ ఆయుధమూ ఏమీ చెయ్యలేదు. అతనితో తలపడటం ఏ దృష్టితో చూసినా తెలివైన
పని కాదు” అంటూ రకరకాలుగా గిల్గమేశుని ప్రయత్నాన్ని వారించ యత్నించారు. కానీ గిల్గమేశుడు ముందుకే కాని వెనక్కి వెళ్లే వాడు కాదాయె. అన్నింటినీ విని కూడా ముందుకు వెళ్లడానికే నిర్ణయించుకున్నాడు.

ఈ విషయాన్ని విన్న గిల్గమేశుని మాతృ శ్రీ నిన్సన్, సూర్యభగవానున్ని ప్రార్థిస్తుంది. “ఓ సూర్య భగవాన్! ఎందుకు గిల్గమేశునికి ఇంతటి చపల చిత్తాన్నిచ్చావ్? అతను తెలియని రహదారిలో ప్రయాణం చెయ్యాలన్న కుతూహలం
ఎందుకు కలిగించావు? కనీ వినీ ఎరుగని యుద్ద తంత్ర నిపుణుడైన హుంబాబాతో తలపడాలనే తలంపు ఎందుకిచ్చావు, ఏం జరిగినా నీదే బాధ్యత. పగలూ రాత్రీ అతన్ని కాపాడవలసిన వాడవు నువ్వే” అంటూ పరి పరి విధముల సూర్యుణ్ని ప్రార్థిస్తుంది.

మాతృ శ్రీ ఆశీర్వచనాలు అందుకొని గిల్గమేశుడు మరియు ఎంకిడులు మరో ఏడుగురు మహా వీరులతోనూ, యాభై మంది అవివాహిత యువ వీర సైన్యంతోనూ హుంబాబాతో తలపడటానికి బయల్దేరుతారు. అందరికంటే ముందు ఎంకిడు నిలిచి దారి చూపుతాడు. ఎంకిడుకి ఈ అరణ్య మార్గం కొట్టిన పిండి కదా! అదియును కాక తను ఇంతకు ముందు
హుంబాబాను ముఖాముఖి చూసి ఉంటాడు. ఇంకా అరణ్య యుద్దాల్లో ఆరితేరినవాడు. ఇరవై యోజనాలు ప్రయాణం చేశాక ఆహారం కోసం విశ్రమించారు. ఆ తర్వాత మరో ముప్పై యోజనాలు ప్రయాణించి గొళ్లెన లెత్తారు. ఎంత వేగంగా ప్రయాణించారంటే ప్రతి మూడు రోజులకీ, సాధారణ జనులు 45రోజూల్లో ప్రయాణించేంత దూరం

ప్రయాణించారు. ఆరు పర్వతాలు ఆరు రోజుల్లో దాటారు. ఈ ఆరు రోజుల ప్రయాణంలోనూ, ప్రతి రోజూ సూర్యాస్తమయానికి ముందే ఒక పెద్ద నుయ్యి తవ్వే వాళ్లు. ఆ తర్వాత గిల్గమేశుడు శకునం చూసేవాడు. ఒక్కొక్క రాత్రి గిల్గమేశునికో కల
వచ్చింది. మొదటి రాత్రి గిల్గమేశుని మీద ఒక పర్వతం పడ్డట్టు కల వచ్చింది.  ఆ కల విని ఎంకిడు ‘భయము వలదు. గిల్గమేశా, ఆ పర్వతమే హుంబాబా. మనం తప్పకుండా హుంబాబాతో తలపడతాం మరియు పట్టి వధిస్తాం. ‘అంటూ
అర్థం చెపుతాడు.

రెండవ రాత్రి గిల్గమేశుని కలలో అదే పర్వతం వస్తుంది. కానీ ఈ సారి ఆ పర్వతం గిల్గమేశుని పాదాలపై పడి అతన్ని ఎటూ  కదలనివ్వదు. అప్పుడొక అందమైన కాంతి ఎంత అందమంటే ఇప్పటివరకు ఈ ప్రపంచంలో అంత అందాన్ని గిల్గమేశుడు
కనలేదు. అటువంటి అందమైన కాంతి దర్శనమిచ్చి గిల్గమేశుని పర్వతం నుండి బయటకు లాగుతుంది. త్రాగటానికి నీరు కూడా ఇస్తుంది. గిల్గమేశునికి ధైర్యం చెపుతుంది. అతని పాదాలు నేలకానిస్తుంది. మూడవ రోజు, నాల్గవ రోజు రాత్రి
కూడా ఇటువంటి కలే వస్తుంది. ఐదవ రోజు ఒక ఎద్దుతో యుద్దం చేసినట్టు కల వస్తుంది. ఈ కలలన్నింటికీ ఎంకిడు తగు అర్థాలు వివరించి గిల్గమేశుని ముందుకు నడిపిస్తాడు.

ఏడవ రోజుకి మరో పర్వత పాదం దగ్గరకు వచ్చారు. అదే దేవదారు వనానికి ద్వారం. అప్పుడు సూర్య భగవానుడు దర్శనమిచ్చి ‘వీరులారా హుంబాబా తన ఏడు రక్షణ కవచాల్లో ఆరు తొలగించాడు. త్వర పడండి. తక్షణమే యుద్దానికి వెళ్లండి’
అని సందేశమిచ్చాడు.

అడవిలో హుంబాబా యొక్క ఘర్జన వినంగనే ఎంకిడు యొక్క ధైర్యం సన్నగిల్లింది.

గిల్గమేశుడు మళ్లా ఎంకిడుకి ధైర్యం నూరిపోశాడు. “ఎంకిడూ! సోదరా!! ఎందుకిలా అధైర్య పడతావు? మనం ఆరు పర్వతాలు దాటి రాలేదు? యుద్దంలో మనం ఆరితేరిన వారం కాదు. నా చెయ్యి పట్టుకో, నా హృదయాన్ని తాకు. నీకు మృత్యువు గురించిన భయం ఉండదు. మనమిద్దరం కలిసి యుద్దానికెళ్తే తిరుగు ఉండదు. పద ముందుకు వెళ్దాం. నాకు నువ్వు రక్ష, నీకు నేను రక్ష.” అంటూ ఎన్నో విధాల ధైర్యం చెప్పాడు.

హుంబాబా నడక వల్ల ఏర్పడిన మార్గంలో వారు ముందుకు వెళ్లారు. వారికెదురుగా మహా దేవదారు వృక్షం కన్పించింది. అక్కడికి దగ్గరలోనే హుంబాబా నివాసం. హుంబాబాను బయటకు పిలవటానికి, అతనికి కోపం తెప్పించటానికి, ఇద్దరూ
కలిసి దేవదారు వృక్షాలు నాశనం చెయ్యటం మొదలు పెట్టారు.

హుంబాబా తీవ్రమైన కోపంలో వీళ్లపైకి వచ్చాడు. భయంకరమైన యుద్దం మొదలయింది. సూర్యభగవానుని ఆశీర్వాద, సహాయాలతో హుంబాబా ఓడించబడ్డాడు.  అలా బంధించ బడ్డ హుంబాబా గిల్గమేశుని శరణు శరణు అంటూ దీనంగా ప్రార్థించాడు. అతను కన్నీటి పర్వంతమయి గిల్గమేశుని వేడుకున్నాడు. జీవితాంతం వరకు బానిసగా ఉంటానన్నాడు. గిల్గమేశుని రాజ భవనాలకు కలప సరఫరా చేస్తానన్నాడు. గిల్గమేశుడు మెత్త బడ్డాడు. ఏం జరిగేదో కానీ ఇంతలో ఎంకిడు
కల్పించుకున్నాడు. ఎంకిడుకి హుంబాబా కుటిల బుద్ది బాగా పరిచయం. “గిల్గమేశా! వెంటనే వధించు. ఆలస్యం చెయ్యవద్దు. ఈ హుంబాబా చాలా కుటులుడు. మాటకు కట్టుబడి ఉండే వాడు కాదు. ఒక్కసారి వదిలావంటే ఇహ అంతే. శతృవుకు చేతులారా ప్రాణం పోసినట్టే. నీకు కళ్లు కనపడకుండా చేస్తాడు. వెళ్లే మార్గానికి అవరోధాలు కల్గిస్తాడు. ” అంటూ రకరకాల దృష్టాంతాలు చెపుతాడు.

ఈ మాటలన్నీ విన్న హుంబాబా పళ్లు పట పట కొరుకుతూ ఎంకిడుని శపిస్తాడు. “మీ ఇద్దరిలో నువ్వు ఎక్కువ కాలం బ్రతకవు” అంటూ శపిస్తాడు. ఇహ ఆలస్యం చెయ్యకుండా గిల్గమేశుడు తన పదునైన గొడ్డలితో హుంబాబా తలను మొండెం నుండి వేరు చేస్తాడు.

విజయోత్సాహంతో ఉరుక్కు నగరానికి తిరిగి వస్తారు. గిల్గమేశుడు హుంబాబాతో వీరంగా పోరాటం చేస్తున్నప్పుడు చూసిన ఇస్తార్ దేవత అతనితో ప్రేమలో పడింది. అదే విషయాన్ని ఆమె పలు ముద్దు ముద్దు మాటలతో, వయ్యారంగా చెప్తుంది. “గిల్గమేశా! నా ప్రియునివి కమ్ము. నీకు అంతులేని సంపదనిస్తాను. కీర్తినిస్తాను. ఇంకా అమోఘమైన శక్తినిస్తాను. కానీ నువ్వు మాకు మాత్రమే స్వంతం కావాలి.”

కానీ గిల్గమేశుడు అంత తేలిగ్గా లొంగే రకం కాదు కదా! “ఇస్తార్! నువ్వో
దేవతవి. నేనా ఒక రాజ్యాధినేతని మాత్రమే. మనిద్దరికీ పొత్తెలా
కుదురుతుంది?”అని ఇంకా “ఇస్తార్! నువ్వో కుంపటివి. బిగించని తలుపువి. గదిని
అది వేడిగానూ ఉంచదు, చల్లగానూ ఉంచదు. అమోఘమైన ఆయుధానివి, కాని
శతృశిబిరంలోని దానివి. యజమానిని కరిచే చెప్పులాంటి దానివి” వంటి పరుషమైన
పదాలతో ఇస్తార్ ని విమర్శిస్తాడు. ఇంకా తన పూర్వాశ్రమంలో ఎంత మంది
ప్రియుళ్లను ఎన్ని రకాలుగా ఇబ్బందులకు గురి చేసిందీ ఏకరువు పెడతాడు. తమోజ్
నుండి ఇషాల్ల వరకు ఎందరిని ఎన్ని రకాలుగా నాశనం చేసిందో చెపుతుంటే
కోపగ్రస్తురాలయిన ఆమె తన తండ్రి దగ్గరకు వెళ్లి “తండ్రీ! దేవాది దేవ అను,
గిల్గమేశుడు చూడండి ఎంత పొగరు పట్టాడో, నన్నే తీవ్రంగా అవమానించాడు. ” అని
పితూరీ చెప్తుంది. కానీ అను శాంతంగా “పుత్రికా! నీ అంతట నువ్వే
గిల్గమేశునితో కయ్యానికి కాలు దువ్వలేదూ! అయినా అతనేం తప్పు
మాట్లాడాడు?  అన్నీ ఉన్న మాటలే కదా అన్నాడు. “అంటూ సర్ది
చెప్పబొయ్యాడు. కానీ గిల్గమేశునిపై పీకల దాకా కోపంతో ఉన్న ఇస్తార్ దేవత
ముందు అను వచనాలన్నీ చెవిటిదానిముందు శంఖం ఊదినట్టే అయినాయి. స్వర్గలోకపు
ఎద్దుని ఇస్తే కానీ ఒప్పుకోనని పట్టు పట్టిన కుమార్తె ముందు తల వంచి అను
ఆమెకు ఆ స్వర్గలోకపు ఎద్దు ముక్కుతాడు కొన అందిస్తాడు. విజయగర్వంతో
గిల్గమేశుని అణగ దొక్కాలన్న కోపంతో ఆమె దాన్ని ఉరుక్కు నగరం పైకి
వదులుతుంది.

 

ఆ భయంకరమైన ఎద్దు ఉరుక్కు నగరం వచ్చి ఒక్కసారిగా బుస పెట్టింది. దెబ్బకు
నూర్గురు పౌరులు చచ్చారు. తరువాత మరోసారి భీకరంగా బుస పెట్టింది, ఈ సారి
రెండు వందల మంది మరణించారు. మూడోసారి బుస పెట్టినప్పుడు పెద్ద గొయ్యి
ఏర్పడింది. అప్పుడే అక్కడకు వచ్చిన ఎంకిడు దాని తోకను బలంగా పట్టుకోని
గిల్గమేశుని కేకేశాడు. “సోదరా! గిల్గమేశా మనమెన్నో పేరు ప్రతిష్టలు
సంపాదించాం. ఇప్పుడవన్నీ పోగొట్టుకుంటామా”  అంటూ పిలవగానే గిల్గమేశుడు
తన పదునైన ఖడ్గంతో ఒక్కేటున ఆ స్వర్గలోకపు ఎద్దు తలను మొండెం నుండి వేరు
చేశాడు. ఎంకిడు దాని గుండె చీల్చి సూర్య దేవునికి ఆరాధన చేశాడు. దాని
కొమ్ములను గిల్గమేశుడు విజయ చిహ్నంగా ఉంచుకున్నాడు. ఇస్తార్ కోపంతో ఏదో
అనబొయ్యేంతలో ఎంకిడు ఆ ఎద్దు తొడ కోసి ఆమె మొహం పైకి విసిరాడు. దానితో
పలాయనం చిత్తగించింది. సోదరులిద్దరూ యూప్రటీస్ నది ఒడ్డున కర చరణాలు శుభ్రం
చేసుకున్నారు. ఆ తరువాత విజయ వాయిద్యాలతో రాజ భవనం చేరుకున్నారు.

కొన్ని రోజుల తరువాత ఓ ఉదయం ఎంకిడు గిల్గమేశుని దగ్గరకు వచ్చి
“సోదరా! రాత్రి నాకో కల వచ్చింది. ఆ కలలో దేవ సభలో దేవతలందరూ మన గురించే
మాట్లాడుకుంటున్నారు. హుంబాబానూ, దేవ లోకపు ఎద్దును వధించినందుకు శిక్షగా
మనిద్దరిలో ఒకరికి మరణం తప్పదని అను దేవుడు అన్నాడు. అలా అయితే ఎంకిడునే
మరణించాలని అనిల దేవుడు అన్నాడు. సూర్య భగవానుడు ఈ అమానుషమైన శిక్షను
ఎదుర్కోవాలని చూశాడు, కానీ ఎవ్వరూ ఆయన మాట వినలేదు” అంటూ విషణ్ణ వదనంతో
చెపుతాడు. ఆ తరువాత కొన్ని రోజులకే ఎంకిడు జబ్బు పడతాడు.

అటువంటి స్థితిలో ఎంకిడును చూసిన గిల్గమేశునికి దుఖము ఆగలేదు. “ప్రియమైన
సోదరా! ఎంకిడూ!! ” అని కన్నీటి పర్యంతం అవుతూ “నిన్ను తీసుకెళ్లి దేవతలు
నన్ను విముక్తుణ్ణి చేస్తున్నారా! అయ్యో!! నా సోదరుణ్ణి నే మళ్లా చూడలేనా”
అంటూ నిరంతరం రోదించసాగాడు.

జబ్బు పడ్డం ఎంకిడు మొదట ఆవేశ పడ్డాడు. తరువాత తనను ఈ ఉరుక్కు నగరం
తీసుకొచ్చిన వేటగాన్నీ, నాట్యగత్తెను, అందరినీ వరుస పెట్టి తిట్ట సాగాడు.
“అయ్యో వారు నన్ను ఈ నగరం తీసుకొని రాకపోతే నాకీ అకాల మరణం ఉండేది కాదు
కదా. నేను ఏ యుద్దంలోనో వీర మరణం పొందకుండా ఇలా ముష్టి మరణం
పొందుతున్నానేమిటి” అంటూ పరి పరి విధముల రోదించసాగాడు.

ఇవన్నీ గమనించిన సూర్య భగవానుడు “ఎంకిడూ, శాంతం వహించు. నువ్వు ఉరుక్కు
నగరాన్ని ఆనందించలేదూ, దేవతలకు మాత్రమే లభించే భోజనం ప్రతి రోజూ
స్వీకరించలేదూ, రాజులు మాత్రమే త్రాగే పానీయాలు ప్రతి రోజూ సేవించలేదూ,
గిల్గమేశుని వంటి గొప్ప స్నేహితుని పొందలేదూ ” అంటూ ఎంకిడును శాంత పరిచాడు.

అలా 12 రోజులు ఎంకిడు అచేతనంగా పడు ఉన్నాడు. ఆ తర్వాత ఈ లోకాన్ని
వదిలి వెళ్లాడు. ఆ దృశ్యాన్ని చూసిన గిల్మమేశుడు కన్నీరు మున్నీరుగా
విలపించాడు. “నా చేతిలోని గొడ్డని నువ్వు, నా నడుముకు వేలాడు పటకా కత్తివి
నువ్వు, నా ముందుండు రక్షణ కవచం నువ్వు, నా సర్వస్వాన్ని దోచుకెళ్లారు.
జీవితమంతా చీకటి మయం అయింది. ఇంకెప్పుడూ నిన్ను చూడలేను. అయ్యో! ” అంటూ ఆర
పగళ్లు ఏడు రాత్రులు రోదించాడు. ఆ తరువాత ఎంకిడు నిలువెత్తు విగ్రహం నగరంలో
ప్రతిష్టించాడు. కానీ గిల్గమేశుడు ఎప్పటికీ మునుపటి గిల్గమేశుడు
కాలేకపొయ్యాడు. ఇంకా కొంత కాలానికి తను కూడా మరణించాల్సిందే కదా అనే దిగులు
పట్టుకుంది.

ఎంకిడు మరణం తరువాత విషాదంలో గిల్గమేశుడు జ్ఞానం కోసం అన్వేషణ
మొదలు పెట్టాడు. అరణ్యాలలో ప్రవేశించి దారి తప్పిన సింహంలా తిరుగాడాడు.
దాటలేని పర్వతాలెన్నో దాటాడు. సముద్రాలపై ప్రయాణించాడు. క్రూరమృగాలతో
పోరాటాలు చేశాడు. వాటి చర్మాలను దుస్తులుగా ధరించాడు. వాటి మాంసాన్నే
ఆహారంగా, వాటి రక్తాన్నే పానీయాలుగా త్రాగాడు. చివరకు సూర్య భగవానుడు
చూడలేక “గిల్గమేశా! ఎందుకిలా పిచ్చి పట్టినవాని వలె తిరుగుతున్నావు?
మరణం ఎవరికైనా తప్పదు కదా! ” అంటూ ప్రశ్నిస్తే “నాకు కావల్సింది దొరికే
వరకూ విశ్రాంతే లేదు. అయినా పర లోకం వెళ్లాక పూర్తిగా విశ్రాంతే కదా. నా
కళ్లు పూర్తిగా మూసుకోక ముందే వెలుగును పూర్తిగా నింపుకోనీ” అంటూ బదులిచ్చి
తన ప్రయాణాన్ని కొనసాగించాడు.

చివరకు గిల్గమేశుడు మాషు పర్వతం దగ్గరకు చేరుకుంటాడు. మాషు పర్వతం

ఉదయాస్తమాన పర్వతాలలో ఒకటి. దానికి కాపలాగా వృశ్చిక జాతి జంట ఉంది. వారు
గిల్గమేశుని అడ్డగించి “ఎక్కడికి” అంటూ ప్రశ్నిస్తారు. ఏ మాత్రం భయపడకుండా
గిల్గమేశుడు “మా పిత్రుదేవుడైన ఉత్తానపిస్తిని దర్శించటానికి వెళ్తున్నాను.
ఎవరైతే దేవ సభలో కూర్చుంటారో, ఎవరైతే మరణాన్ని జయించారో అట్టి
ఉత్తానపిస్తిని దర్శించటానికి వెళ్తున్నాను” అంటూ బదులిచ్చాడు.

ఏ మానవుడూ ఈ దారిలో ఇంతవరకూ వెళ్లలేదు. ఇరవై
నాలుగు గంటలు కటికి చీకటిలో ప్రయాణించాలి. కాంతి రేఖ కూడా ఉండదు. ఒకరికి
ముందు ఏమున్నదో, వెనక ఏమున్నదో అస్సలు కన్పించదు. ” అంటూ గిల్గమేశుని
ప్రయత్నాన్ని వారించాలని చూశారు. కానీ గిల్గమేశుడు లెక్క చెయ్యకుండా
ముందుకే వెళ్లాడు. సూర్యుడు రాత్రిపూట ప్రయాణించే ఆ చీకటి మార్గాన్ని
గిల్గమేశుడు ధైర్యంగా ఇరవై నాలుగు గంటల్లో దాటాడు. అతని ఎదురుగా ఓ
సుందరోద్యానవనం కాంతులీనుతూ నిల్చింది. అందులో అన్నీ దేవ లోకపు వృక్షాలే!
అందులో వజ్రవైఢూర్యాలు కాంతులీనుతూ ప్రకాశించసాగాయి.

ఇంకా కొంచెం ముందుకు వెళ్లాక పూటకూళ్లమ్మ — సింధూరి ఎదురయింది. ఆమె
సముద్రపు ఒడ్డున ఉంది. ఆధ్యాత్మిక దాహం ఉన్న వాళ్ల దప్పిక తీరుస్తుంది.
గిల్గమేశును చూసి అతని వృత్తాంతం అడుగుతుంది. గిల్గమేశుడు తన గురించి,
ఉరుక్కు నగరం గురించి, ఎంకిడుతో స్నేహం గురించీ, ఎంకిడు మరణం గురించీ,
ఎంకిడు గురించి తను రోదించిన ఆరు పగళ్లు, ఏడు రాత్రుల గురించీ,
ఉత్తానపిస్తిని కలుసుకోవాలన్న తన ప్రయత్నం గురించీ వివరిస్తాడు. అంతా విన్న
సింధూరి అతని ప్రయత్నాన్ని ఆపాలని చూస్తుంది. “గిల్గమేశా! దేవాది దేవుడైన
అను మనుష్యులను సృష్టించినప్పుడు అతని మరణాన్ని కూడా ఓ భాగం చేశాడు. ఈ వృథా
ప్రయత్నం మాని జీవితాన్ని ఆనందించు.

నీ కడుపు నిండా తిను

ప్రతి రోజునీ ఆనందించు.

ఆడు, పాడు, పరవశించు

ప్రతి రాత్రీ వసంత రాత్రి చేసుకో

నీ ఒడిలో సేద తీరే భార్యను చేరుకో

నీ చేతిలో ఆడే పిల్లలను చూసుకో” అంటూ పరి పరి విధముల గిల్గమేశుని
ప్రయత్నాన్ని ఆపాలని చూస్తుంది. కానీ గిల్గమేశుడు వినడు. వినకుండా ఉండటమే
కాకుండా సింధూరిని దారి చూపమని అడుగుతాడు.

ఇంతవరకూ ఏ మానవుడూ ఇక్కడకు రాలేదు. ఈ
దారిలో ప్రయాణించలేదు. ఈ దారి బహు కష్టతరమైనది. కేవలం సూర్య భగవానుడే
దాటగలడు. ఇక్కడి నీరు సాక్షాత్ మృత్యువే. కానీ ఒడ్డున ఉర్షాంబి ఉంటాడు.
అతను సహాయపడితే నువ్వు దాటగలవు. లేకుంటే వచ్చిన దారి చూసుకోవటం ఉత్తమం.”
అని చెప్తుంది.

ఒడ్డుకు వెల్తే ఉర్షాంబి కన్పించడు. అక్కడి రాళ్లు కొన్ని ప్రాణం
పోసుకోని గిల్గమేశునిపై దాడి చేస్తాయి. గిల్గమేశుడు తన పదునైన గొడ్డలితో
వాటిని నాశనం చేస్తాడు. ఆ తర్వాత కొంతసేపటికి ఉర్షాంబి అరణ్యం నుండి వచ్చి
గిల్గమేశుని చూసి యోగక్షేమాలు విచారిస్తాడు. గిల్గమేశుడు తన కథ మొత్తం
మొదటి నుండి ఓపిగ్గా వివరిస్తాడు. ఆ తరువాత ఆవలి ఒడ్డుకు చేర్చమని
అడుగుతాడు. కానీ అక్కడ నాశనం అయిన రాళ్లను చూసి ఆశ్చర్యపోయి ఆవలి ఒడ్డుకు
చేరలేమని చెప్తాడు. కానీ ఉర్షాంబి ఎలాగయినా గిల్గమేశునికి సహాయపడాలని
అడవిలోకి వెళ్లి మూడు వందల పొడగాటి కర్రలు తెచ్చి పడవలో వేసుకొని వాటినే
తెడ్డుగా వేస్తూ పడవ నడుపుతాడు. ఆ కర్రలు నీరు తాకితే నాశనం అవుతుంటాయి.
అత్యంత చాకచక్యంగా ఇద్దరూ నీటిని తాకకుండా ఆవలి ఒడ్డుకు చేరుకుంటారు.

ఆవల ఒడ్డున ఉత్తానపిస్తి గిల్గమేశుని చూసి అతని కథ అడుగుతాడు.
మళ్లా  గిల్గమేశుడు మొదటి నుండి మొత్తం కథ చెప్తాడు. అంతా చెప్పి
మృత్యువును జయించే మార్గం అడుగుతాడు. కానీ ఉత్తానపిస్తి అటువంటి మార్గమేదీ
లేదని బదులిస్తాడు.

ఉత్తానపిస్తీ! నిన్ను చూడు. అచ్చం నాలానే
ఉన్నావు. అయినా నువ్వు మృత్యువును జయించావు. నేను మాత్రం ఎందుకు జయించలేను”
అని పరుషంగా ప్రశ్నిస్తాడు.

గిల్గమేశా! నీకోక దేవ రహస్యం చెప్తా,
శ్రద్దగా విను. మహా జల ప్రళయానికి ముందు ఎంకి దేవుడు నాకు దర్శనమిచ్చి నా
గృహాన్ని పడగొట్టి ఒక పడవను తయారు చెయ్యమంటాడు. అన్ని బంధాలు వదులుకొని నా
ప్రాణాన్ని నిలుపుకోమంటాడు. ఏడు అంతస్తుల ఆ పడవను నేను ఆరు రోజుల్లో
నిర్మించాను. అతి కష్టం మీద దాన్ని నిలపెట్టాను. ఏడవ రోజు వర్షం మొదలయింది.
మొత్తం అంతా చీకటిగా మారిపోయింది. ఆరు పగళ్లూ, ఏడు రాత్రులూ గాలి వీచింది.
ఏడవ రోజు సూర్యోదయం అయింది. ఎక్కడ చూసినా నీరే. అందా నిశ్శబ్దం. నిశిర్
పర్వత శిఖరంపై పడవ ఆగింది. ఆ తరువాత కొన్ని రోజులకు అనిల దేవుడు నన్ను చూసి
ఆశ్చర్యపొయ్యాడు. మనుషులందరూ ఈ మహా జల ప్రళయంలో మరణించి ఉండాలి. కాని ఎంకి
దయ వల్ల నేను బ్రతికాను. చివరకు నేను, నా భార్య అను దేవుడి ఆశీస్సులతో
దేవతలతో సమానం అయ్యాము. ”

అంతా విని గిల్గమేశుడు ‘అయితే నా అమరత్వం గురించి దేవ లోకాన్ని
ఎవరు ఒప్పించగలరు’ అంటూ అడుగుతాడు. దానికి ఉత్తానపిస్తి “అయితే నువ్వు ఆరు
పగళ్లు, ఏడు రాత్రులు నిద్ర పోకుండా ఉండు, తర్వాత చూద్దాం” అని
ఆజ్ఞాపిస్తాడు.

కానీ గిల్గమేశుడు ఏడవ రోజు రాత్రి నిద్రపోతాడు. ఏడవ రోజు ఉదయం
ఉత్తానపిస్తి గిల్గమేశుని నిద్ర లేపి నువ్వు విఫలం అయ్యావు అని చెప్తాడు.
దానితో విచార వదనంతో ఉన్న గిల్గమేశుని చూసి ఉత్తానపిస్తి భార్య,
గిల్గమేశునికి ఏదన్నా సహాయం చెయ్యమని అడుగుతుంది.

ఉత్తానపిస్తి గిల్గమేశుని దగ్గరకు వెళ్లి “గిల్గమేశా! ఈ సముద్రం అడుగున
ఒక వేరు ఉంటుంది. అది ఏడు రంగుల్లో , సువాసనతో కూడి ఉంటుంది. అది తింటే
యవ్వనం తిరిగి వస్తుంది.” అని రహస్యం చెప్తాడు. దానితో గిల్గమేశుడు తన
రెండా కాళ్లకూ, రెండు రాళ్లు కట్టుకొని సముద్రం అడుగున నడిచి ఆ వేరు
సంపాదిస్తాడు. పైకి వచ్చాక నేనీ వేరును ముందుగా ఉరుక్కు నగరంలో ఒక
ముదుసలిపై ప్రయోగించి, ఆ తర్వాత స్వీకరిస్తాను. అనుకోని తన దుస్తుల్లో
దాచుకుంటాడు.

ఉత్తానపిస్తి — గిల్గమేశునికి తోడుగా ఉర్షాంబిని పంపుతాడు.
వారిద్దరూ కలిసి తిరుగు ప్రయాణం అవుతూ దారిలో స్నానానికి ఆగినప్పుడు ఆ వేరు
ఒడ్డున ఉంచుతారు. వాసనకు ఆకర్షితమైన ఓ పాము దాన్ని తిని కొత్త చర్మం
పొందుతుంది.

విచార వదనంతో, వట్టి చేతులతో గిల్గమేశుడు ఉరుక్కు నగరానికి తిరిగి వచ్చి
నగరాన్ని చూసి చాలా సంతోషించి, తనలాగా ఎవరూ ఫలితం లేని కార్యాలవైపు దృష్టి
మరల్చకుండా తల గాథను రాజ్యమంతా శిలాక్షరాల్లో లిఖిస్తాడు. ఉర్షాంబికి
గర్వంగా తన నగరాన్నీ, కుడ్యాలను చూపి వాటిలోనే తను అమరుడను అని చెప్పి
సంతోషిస్తాడు.

 

posted by chavakiran in తెలుగు and have Comment (1)

ముత్యాలమ్మ కథలు: విందు

ఈ రోజు ‘జేజి’ మహోత్సాహంగా వుంది. అంటే నాన్నకి తెలియకుండా ఏదో పెద్ద ప్లాన్ వేస్తుందని అర్థం. పాపం నాన్న! గతంలోని రెండు మూడు ప్లాన్‌లు గుర్తొచ్చాయి నాకు. చేతిలోని కర్రతో భూదేవిని టింగ్, టింగ్ మని పొడుస్తూ ‘పెద్దోడా!’ అని పిలుస్తూ నా వంక పరిగెత్తుకొచ్చింది.

“నోరిప్పుడెలా వుంది?” అంటూ అడిగింది. నాకు నిన్నటినుండి నోరు పూసింది. ఏదో చెబుదామని నోరు తెరిచాను. ఇంతలో, “ఆ పచ్చళ్ళు వాడికి పెట్టొద్దంటే విన్లేదు” అంటూ అమ్మ కూడా జాయిన్ అయింది. ఇహ నేనేం చెప్పక్కర్లేదని నాకు తెలుసు.
అమ్మ చేతిలో టీ గ్లాసు “జేజి” కిచ్చి, నా వైపు తిరిగి డాక్టరులాగా నానోరు, నాలుక, బుగ్గలపై, నుదుటిపై వచ్చిన పొక్కులు పొద్దెండ వెలుగులో పట్టి పట్టి చూసి ఏం మాట్లాడకుండా ఇంట్లోకి దారి తీసింది. ఆమె ఎక్కడకు వెళ్తుందో నాకు తెలుసు – ఆ మందులు డబ్బా దగ్గరకే.
అప్పటివరకు దూరదూరంగా పనులు చేసుకుంటున్న ఎంకడు జేజి దగ్గరకొచ్చి ఏదో చెప్పబోయేంతలో జేజి వాడిని మాట్లాడనీకుండా కోడలు మందులు తేటానికి బోయిందిగాని, నువ్వు వీణ్ని తోలుకపోయి మఱ్ఱి చెట్టు ఊడ ఒకటి పెరికి నమిలించు.” అంటూ తొందరపెట్టింది.
“బతికాన్రా బాబు అనుకుంటూ మఱ్ఱి చెట్టు కేసి నడవబోతుంటే మళ్ళా జేజి గొంతు వినిపించింది.” నేఁ జెప్పిన పనేం చేశావ్?” దానికి వంతగా ఎంకడు” అంతా నువ్ చెప్పినట్టే చెప్పా” అని నాతోపాటు మఱ్ఱి చెట్టువైపు కదిలాడు.
***
మఱ్ఱి ఊడ నములుతూ నెమ్మదిగా తోటలోనుంచి వస్తుంటే వినిపించిందా ఆర్తనాదం. ఒళ్ళంతా ఒక్కసారిగా జలదరించింది. హృదయ వికారంగా ఉంది. గట్టిగా ఉలిక్కిపడ్డాను. ఎంకడు మాత్రం నవ్వి నా వీపు మీద అరచేత్తో కొట్టాడు. ఆ దెబ్బకు ఈలోకంలోకి వచ్చిపడ్డాను. ‘ఏమిటది’ అన్నట్టు ఎంకడు వైపు చూశా. “ఇయ్యాల ముత్యాలమ్మ గదా! మేక తల తెగింది” అంటూ ముందుకు దారి తీశాడు.
వెళ్ళేసరికి జేజి అక్కడే వుంది. కాకుంటే నిలబడకుండా నాపరాయిమీద సతికిలబడింది. పక్కనే ఖాళీ అయిన టీగ్లాసు, దానిమీద ఒకటి రెండు ఈగలు. చేతిలో మరో లోటా ఉంది.
అమ్మ కూడా మందుల డబ్బా పట్టుకొని రెడీగా వుంది. గడ్డిపరకలు గీరుకొని ఎర్రగా అచ్చులు పడ్డ నా చేతులు చూస్తూ “అలా తోటలో తిరగొద్దన్నాగా” అంటూ అడిగింది. “తిరక్కుండా ఇంట్లో ఉంటే పొద్దు ఎలా పోద్దే కోడలా!” అంటూ చేతికర్రతో నేలను గట్టిగా పొడిచి లేచి ఆ చేతిలో ఉన్న లోటా నాకేసి చాస్తూ “ఇంక నమిలింది చాల్లేగాని, ఆ పుల్ల అవతల పడేసి పుక్కిలిచ్చి వూసి ఈ పటిక నీళ్ళు తాగు” అని. ఆ తర్వాత అమ్మవైపు తిరిగి “నోరు పూస్తే అన్ని గొట్టాలెందుకే రెండు రోజుల్లో మానిద్దిలే” అంది. ‘ఇహ లోపలికెళ్ళి పని చూసుకో’ అని కళ్ళ తోనే జేజి అనడంతో అమ్మ మరేం మాట్లాడకుండా లోపలికెళ్ళింది.
అప్పుడు మరోసారి విన్పించింది ఆ హృదయవికార ఆర్తనాదం.
జేజి నా వైపు వింతగా చూసింది. నేను పట్టిచ్చుకోకుండా గాబు దగ్గరకెళ్ళి పుక్కిలిచ్చి ఊసి లోటాలో పటిక నీళ్ళు నెమ్మదిగా తాగసాగాను. ఏమాటకామాటే చెప్పుకోవాలి, చాలా హాయిగా ఉంది.
వెనక్కి తిరిగి చూస్తే, నాన్న వేగంగా జేజి దగ్గరకు వస్తూ కన్పించాడు. ”అమ్మా! నువ్వు చెప్పావని రెండు కోయించాను. కూర మిగిలిపోద్దేమో అనిపిస్తుంది.”
జేజి ఒక నవ్వు నవ్వి “ఈ వూరోళ్ళు ఎంత తింటారో నీకు తెలీదురా. రెండు కాదు, ఇరవై ఏటలయినా సరిపోవు” అంది.
ఎంకడు టీ తాగుతూ ముసిముసిగా నవ్వుకోసాగాడు.
***
హడావుడి పదకొండింటికే మొదలయింది. పన్నెండింటికే మూడు బంతులు లేచాయి. జేజి అక్కడే కూర్చుని చుట్ట తాగుతూ వచ్చే వాళ్ళనో, పొయ్యేవాళ్ళనో గట్టిగా పలకరిస్తూంది. చాలా సార్లు ఏదో ఒకటి అనటం – వాళ్ళతో పాటు పగలబడి నవ్వటం. మూడోబంతి అయ్యాక జేజి చెప్పడంతో ఎంకడు, నాన్న ఇంకా అప్పటిదాకా వడ్డించినోళ్ళు అందరూ కూర్చున్నారు. తమ్ముడు ఎంచక్కా నాన్న పక్కన సెటిల్ అయ్యాడు. ఒక్కక్షణం నేను కూడా ఆ నాలుగో బంతిలో కూర్చోవాలనుకున్నా కానీ అసలే నోరు పూసింది అంత కారం తింటానో లేదో అని గమ్మునున్నాను. ఇంతలో అమ్మవచ్చి “నీకు కారం లేకుండా కూర తీశాను, తర్వాత చెల్లితో పాటు తిందువుగానిలే” అనడంతో హమ్మయ్య అనుకున్నా.
***
నాన్న చెయ్యి కడుక్కొని జేజి కాడకొచ్చి
“అమ్మా! కూర ఇంకా చాలా ఉన్నట్టుంది?”
“పిలిచినోళ్ళందరూ వచ్చినట్టేనా?”
“ఆఁ!”
“ఆ సుబ్బయ్య కనబళ్ళేదు?”
“వాడికి ఒంట్లో బాగోలేదమ్మా”
“అవునా! ఈ సారేమయింది?”
“జొరం”
“అవున్రా! ఊళ్ళో రెండు వీధులేనా?”
“అమ్మా!”
“సర్లే, ఎలాగూ కూర మిగిలిందిగా. నీళ్ళు కాగి వున్నాయి. బియ్యం యసట్లో పొయ్యమనిచెప్పు. ఆ ఎంకడును పిలిచి మిగతా రెండు వీధులను కూడా రమ్మను.”
ఒక్కక్షణం నాన్న ఏం మాట్లాడలేదు. ఆ తర్వాత ఎంకడు ఎక్కడ వున్నాడో అని వెనక్కి తిరిగి చూశాడు. అందుకోసమే ఎదురు చూస్తున్నట్టు ఎంకడు ముందుకొచ్చాడు.
జేజి మరోసారి కర్ర టిక్కు టిక్కు అనిపించుకుంటూ వంటల దగ్గరకెళ్ళి గిన్నెలన్నీ మూతలు తీసి మళ్ళా మూతలు పెట్టింది. బాపయ్య దగ్గర కెళ్ళి యసట్లో బియ్యం పోశావా? అని అడిగింది. పోశానన్నట్టు తలూపాడు. జేజి ఒక్కక్షణం ఆలోచించి “ఉల్లిగడ్డలు ఇంకొన్ని కోయించు. మరీ సన్నగా కాకుండా పెద్ద ముక్కలు చెయ్యి” అని నావైపు తిరిగింది.
“అన్నం తిన్నావా?”
‘లేదు’ అన్నట్టు తలూపాను.
“ఆకలెయ్యడంలేదా?”
అవునన్నట్టు, కాదన్నట్టు తలూపాను.
“సర్లే- నోటిపూత ఎలా వుంది?”
నేనేదో చెప్పబోయేంతలో మళ్ళీ జేజే “రెండ్రోజుల్లో తగ్గిపోతుందిలే. మీ అమ్మని మాత్రం ఆ మందుల డబ్బాకాడికి పోనీకు”
అనేసి నాపరాయి దగ్గరకెళ్ళి సెటిల్ అయి చుట్ట వెలిగించింది.
***
అప్పుడే వచ్చిన ఎంకడుతో…
“అందర్నీ కేకేశావా?”
“ఆఁ!”
“కూర చూసి వడ్డించు. ఆ గోలయ్యకు మాత్రం గిన్నె ఇవ్వకు. వాణ్ని అన్నమే వడ్డించమను” అని చెప్పింది.
పిలవడమెందుకు? పిలిసి కూర చూసి వడ్డించడమెందుకు? అని అనుకున్నాను కానీ ఆఖరి బంతి అయిన తర్వాత గాని అర్థం కాలేదు జేజి అలా ఎందుకన్నదో. కూర మొత్తం అయిపోయింది. ఏదో అడుగూ బొడుగూ మిగిలింది. అన్నం కూడా అంతే. జేజి అలా అనకపోతే గోలయ్య రెండు బంతుల ముందే కూరంతా పందేరం చేసేటోడు. పిలిచి పీకలదాకా వడ్డించడంతో పాటు, పిలిచినోళ్ళందరికీ వడ్డించడం ముఖ్యమే గదా! దానికి తోడు కూర అయిపోయి అన్నం మిగిల్తే ఇంకా నామోషిగదా.
***
ఆరోజు సాయంత్రం తీరుబడిగా కూర్చొని జేజి నాతో “మీ నాన్న దేశాలు తిరిగి సంపాయించుకొచ్చాడేగాని పల్లెటూళ్ళో ఎట్ట బతకాలో తెలీదు.” అంది.
***

posted by chavakiran in కథ,తెలుగు,తెలుగు సైన్స్ ఫిక్షన్ and have No Comments